நீரேறிய
உப்புகள் மற்றும் படிகமாக்கல் நீர்
அயனிச் சேர்மங்களை நீரில் கரைத்து
தெவிட்டிய கரைசலை உருவாக்கும் போது, அவற்றின் அயனிகள் நீர் மூலக்கூறுகளைக் கவர்ந்து,
குறிப்பிட்ட வேதி விகிதத்தில் பிணைப்பினை ஏற்படுத்திக் கொள்கின்றன.
இந்நிகழ்வு நீரேற்றம் எனப்படும். இந்த அயனிச் சேர்மங்கள் அவற்றின் தெவிட்டிய
கரைசலில் இருந்து குறிப்பிட்ட எண்ணிக்கையிலான நீர் மூலக்கூறுகளுடன் சேர்ந்து
படிகமாகிறது. இந்தப் படிகங்களுடன் காணப்படும், நீர்
மூலக்கூறுகளின் எண்ணிக்கையே படிகமாக்கல் நீர் எனப்படும். அத்தகைய படிகங்கள்
நீரேறிய உப்புகள் எனப்படும்.
இப்படிக உப்புகளை வெப்பப்படுத்தும்
போது, அவை படிகமாக்கல்
நீரை இழந்து படிக உருவற்றதாக மாறுகின்றன மற்றும் நிறத்தை இழக்கின்றன (அவை நிறமுள்ள
உப்புகளாக இருந்தால்). சில பொதுவான நீரேறிய உப்புகள் அட்டவணை 9.3-இல் கொடுக்கப்பட்டுள்ளது
1. காப்பர் சல்பேட்
பென்டாஹைட்ரேட் CuSO4.5H2O (நீல
விட்ரியால் அல்லது மயில்துத்தம்)
நீல விட்ரியால் உப்பில் ஐந்து நீர்
மூலக்கூறுகள் உள்ளன. இதன் படிகமாக்கல் நீர் மூலக்கூறுகளின் எண்ணிக்கை ஐந்து.
நீலநிற காப்பர் சல்பேட் பென்டாஹைட்ரேட் படிகத்தை மெதுவாக வெப்பப்படுத்தும் போது, ஐந்து நீர்
மூலக்கூறுகளை இழந்து நிறமற்ற, நீரற்ற காப்பர் சல்பேட் ஆக
மாறுகிறது.
நிறமற்ற, நீரற்ற காப்பர்
சல்பேட் உப்பில் சில துளி நீரினைச் சேர்க்கும் போது அல்லது குளிர்விக்கும் போது
உப்பானது மீண்டும் நீல நிற நீரேறிய உப்பாக மாறுகிறது
2. மெக்னீசியம்
சல்பேட் ஹெப்டாஹைட்ரேட் MgSO4.7H2O (எப்சம்
உப்பு)
எப்சம் உப்பின் படிகமாக்கல் நீர்
மூலக்கூறுகளின் எண்ணிக்கை ஏழு. மெக்னீசியம் சல்பேட் ஹெப்டா ஹைட்ரேட் படிகத்தை
மெதுவாக வெப்பப்படுத்தும் போது ஏழு நீர் மூலக்கூறுகளை இழந்து நீரற்ற மெக்னீசியம்
சல்பேட்டாக மாறுகிறது.
நீரற்ற மெக்னீசியம் சல்பேட்டில் சில
துளி நீரைச் சேர்க்கும் பொழுது அல்லது குளிர்விக்கும் பொழுது உப்பானது மீண்டும்
நீரேறிய உப்பாக மாறுகிறது.