கதிர்வீச்சு | அணுக்கரு இயற்பியல் - பாதுகாப்பு வழிமுறைகள் | 10th Science : Chapter 6 : Nuclear Physics
பாதுகாப்பு
வழிமுறைகள்
அன்றாடம் நீங்கள் சூரியனிடமிருந்து
சில இயற்கைக் கதிரியக்கங்களைப் பெறுகின்றீர்கள். மேலும் மண் மற்றும் பாறைகள், வீட்டு உபயோகப்
பொருள்களான தொலைக்காட்சி, நுண்ணலைச் சூடேற்றி (micro
oven), அலை பேசி மற்றும் மருத்துவ துறையில் பயன்படும் X கதிர்கள் ஆகியவற்றிலிருந்து கதிரியக்கங்கள் வெளியாகின்றன. இவை மிகக்
குறைந்த செறிவைப் பெற்றுள்ளதால் கடுமையான பாதிப்புகளை ஏற்படுத்துவதில்லை.
அணுக்கரு சோதனைகளை வளிமண்டலத்திலும், பூமிக்கடியிலும்
நிகழ்த்துவதால் வெளியாகும் கதிர்வீச்சுகளும், அணுக்கரு
உலையிலிருந்து வெளியாகும் கதிர்வீச்சுகளுமே மனிதன் உருவாக்கிய இரண்டாவது
கதிரியக்க மூலமாகக் கருதப்படுகிறது
கவனக் குறைவாகவும் முறையின்றியும்
கதிரியக்கப் பொருள்களை கையாள்வதால், மனிதர்களுக்குத் தீங்கினை ஏற்படுத்தக்கூடிய
அபாயகரமானக் கதிர்வீச்சுகள் வெளியாகின்றன. மேலும் நீண்ட காலம் கதிரியக்கங்களுக்கு
மிக அருகில் பணி செய்யும் ஒருவரின் உடல் நலம் மிகுந்த பாதிப்புக்குள்ளாவதுடன்
மரபியல் ரீதியாகவும் பாதிக்கப் படக்கூடும்.
மனித உடலின் மீது கதிர்வீச்சுப்
படும்போது பாதிப்பை ஏற்படுத்தாத கதிர்வீச்சின் பெரும் அளவை பன்னாட்டு கதிரியக்கப்
பாதுகாப்புக் கழகம் (ICRP)
பரிந்துரை செய்துள்ளது. ஓர் ஆண்டிற்கான கதிரியக்கப் பாதிப்பின்
பாதுகாப்பான அளவு 20 மில்லி சிவர்ட் ஆகும். இதனை ராண்ட்ஜன்
அலகில் குறிப்பிடும்போது கதிர்வீச்சு ஒரு வாரத்திற்கு 100 மில்லி ராண்டஜன் என்ற அளவில் இருக்க வேண்டும். கதிர்வீச்சுப் பாதிப்பு 100
R என்றிருந்தால் மிகவும் அபாயகரமான பாதிப்பான ரத்தப் புற்றுநோயை (ரத்தச் சிவப்பணுக்களின் அழிவு) ஏற்படுத்தும். கதிர்வீச்சுப் பாதிப்பு 600
R என்ற அளவில் இருக்கும் போது இறப்பை உண்டாகும்.
உங்களுக்குத் தெரியுமா?
அயனியாக்கும் கதிர்வீச்சின்
அளவினைக் கண்டறியும் சாதனம் டோசிமீட்டர் ஆகும். அணுமின் நிலையம் அமைந்துள்ள
இடங்களில் கதிரியக்கம் வெளியாகும் அளவை அவ்வப்போது கண்டறியவும் மருத்துவ நிழலுரு
தொழில்நுட்பத்திலும் பயன்படுகிறது. X மற்றும் காமா (γ) கதிர்கள் வெளியாகும் பகுதிகளில்
பணியாற்றுவோர் கையடக்க டோசிமீட்டரை அணிந்து கொள்வதன் மூலம் கதிரியக்க உட்கவர்
அளவினை அறிந்து கொள்ள இயலும்.
கதிரியக்கப் பொருள்களைத் தடிமனான
காரீயச் சுவர்களால் ஆன கொள்கலனில் வைக்க வேண்டும்.
· அபாயகரமான பணிபுரிவோர் கதிரியக்கப்பகுதிகளில் காரீய கையுறைகளையும் காரீயத்தினாலான
மேலாடையையும் கட்டாயமாக அணிய வேண்டும்
· கதிரியக்கப் பொருள்களைக் கையாளும் போது உணவருந்துவதை தவிர்க்க
வேண்டும்.
· கதிரியக்கப் பொருள்களை இடுக்கிகள் அல்லது தொலைக்கட்டுப்பாட்டு
கருவி (remote) ஆகியவற்றை
பயன்படுத்தி மட்டுமே கையாள வேண்டும். நேரடியாக தொட்டுப் பயன்படுத்தக் கூடாது.
· டோசிமீட்டரை அணிந்து கொள்வதன் மூலம் கதிரியக்கத்தினைப்
பயன்படுத்துவோர் எடுத்துக் கொள்ளும் கதிரியக்க அளவினை அவ்வப்போது அறிந்து கொள்ள
இயலும்.