வினா விடை

மதிப்பீடு

I சரியான விடையைத் தேர்ந்தெடுக்கவும்

1. ஒரு மாநிலத்தின் ஆளுநர் யாரால் நியமிக்கப்படுகிறார்?

அ) குடியரசுத் தலைவர்

ஆ) துணைக் குடியரசுத் தலைவர்

இ) பிரதம மந்திரி

ஈ) முதலமைச்சர்

[விடை: அ) குடியரசுத் தலைவர்]

2. மாநில அமைச்சரவைக் குழுவின் தலைவர்

அ) ஆளுநர்

ஆ) முதலமைச்சர்

இ) சபாநாயகர்

ஈ) உள்துறை அமைச்சர்

[விடை:  ஆ) முதலமைச்சர்

3. மாநில சட்டமன்ற கூட்டத்தைக் கூட்டவும், ஒத்திவைக்கவும் அதிகாரம் பெற்றவர்

அ) உள்துறை அமைச்சர்

ஆ) குடியரசுத் தலைவர்

இ) சபாநாயகர்

ஈ) ஆளுநர்

[விடை: ஈ) ஆளுநர்]

4. உயர் நீதி மன்ற நீதிபதிகளை நியமிப்பதில் பங்கு பெறாதவர் யார்?

அ) ஆளுநர்

ஆ) முதலமைச்சர்

இ) உயர் நீதி மன்ற தலைமை நீதிபதி

ஈ) குடியரசுத் தலைவர்

[விடை:  ஆ) முதலமைச்சர்]

5. உயர் நீதிமன்ற நீதிபதிகள் ஓய்வு பெறும் வயது

அ) 62

ஆ) 64

இ) 65

ஈ) 58

[விடை: அ) 62]

II. கோடிட்ட இடங்களை நிரப்புக

1. இந்தியாவில் உள்ள மொத்த மாநிலங்களின் எண்ணிக்கை 29 ஆகும்.

2. ஆளுநரின் பதவிக்காலம் 5 ஆண்டுகள் ஆகும்.

3. மாவட்ட நீதிபதிகள் ஆளுநர் ஆல் நியமிக்கப்படுகின்றனர்.

4. ஆளுநர் ஒரு மாநிலத்தின் நிர்வாகத் தலைவர் ஆவார்.

5. ஒருவர் சட்டப்பேரவை உறுப்பினராக 25 வயது நிறைவடைந்திருக்க வேண்டும்.

III பொருத்துக

1. ஆளுநர் - கீழவை

2. முதலமைச்சர் – பெயரளவுத் தலைவர்

3. சட்டமன்ற பேரவை - மேலவை

4. சட்டமன்ற மேலவை – உண்மையான தலைவர்

விடைகள்

1. ஆளுநர் - பெயரளவுத் தலைவர்

2. முதலமைச்சர் – உண்மையான தலைவர்

3. சட்டமன்ற பேரவை - கீழவை

4. சட்டமன்ற மேலவை – மேலவை

IV சரியா / தவறா எனக் குறிப்பிடுக

1. முதலமைச்சர் மாநிலத்தின் தலைமை நிர்வாகி ஆவார். விடை : சரி

2. ஆளுநர் சட்ட மன்றத்திற்கு இரண்டு ஆங்கிலோ இந்திய உறுப்பினர்களை நியமிக்கிறார். விடை: தவறு

3. உயர் நீதிமன்ற நீதிபதிகளின் எண்ணிக்கை நிலையாகவும் ஒரே மாதிரியாகவும் இருப்பதில்லை . விடை : சரி

V சரியான கூற்றைத் தேர்ந்தெடு

1. மாநில சட்டமன்ற உறுப்பினர்கள் கீழ்கண்டவர்களுள் யாரைத் தேர்ந்தெடுப்பதில் பங்கு பெறுகின்றனர்.

i. குடியரசுத் தலைவர்

ii. துணை குடியரசுத் தலைவர்

iii. ராஜ்ய சபை உறுப்பினர்கள்

iv. சட்டமன்ற மேலவை உறுப்பினர்கள்

அ) i, ii & ii சரி

ஆ) i மற்றும் iii சரி

இ) iii மற்றும் iv சரி

ஈ) i,ii,iiii மற்றும் iv சரி

விடை : இ) iii மற்றும் iv சரி

VI.கீழ்க்காணும் வினாக்களுக்கு ஓரிரு வார்த்தைகளில் விடையளி

1. மாநில சட்டமன்றத்தின் இரு அவைகளின் பெயரை எழுதுக.

> இந்தியாவில் மாநில சட்டமன்றம் என்பது ஆளுநரையும் ஒன்று அல்லது இரண்டு அவைகளையும் கொண்டிருக்கும்

> சட்டமன்ற மேலவை, சட்டமன்ற கீழவை முதலியன இரு அவைகளாகும்.

2. மாநில சட்டமன்ற பேரவை உறுப்பினராவதற்கு உள்ள தகுதிகள் யாவை?

> சட்டமன்ற பேரவை உறுப்பினராக ஒருவர் 25 வயது நிரம்பியவராக இருத்தல் வேண்டும்.

> இந்திய குடிமகனாக இருத்தல் வேண்டும்.

> பாராளுமன்றத்தின் இரு அவைகளிலும் உறுப்பினராக இருத்தல் கூடாது

3. முதலமைச்சர் எவ்வாறு நியமிக்கப்படுகிறார்?

> ஆளுநர் மாநில சட்டமன்றத்தில் பெரும்பான்மை கொண்டுள்ள கட்சியின் தலைவரை மாநில முதலமைச்சராக நியமிக்கிறார்.

> முதலமைச்சர் மாநில சட்டமன்றத்தில் உறுப்பினராக இருத்தல் வேண்டும். இவர் பதவியேற்கும் போது உறுப்பினராக இல்லாவிட்டால் 6 மாதத்திற்குள் சட்டமன்ற உறுப்பினராகத் தேர்ந்தெடுக்கப்படுதல் வேண்டும்.

4. மாநில அமைச்சரவை குழு எவ்வாறு உருவாக்கப்படுகிறது?

> முதலமைச்சர், அவரது கட்சி சட்டமன்ற உறுப்பினர்களிலிருந்து அமைச்சர்களை தேர்வு செய்கிறார்.

> முதல்வர் மற்றும் அவரது தலைமையிலான பல்வேறு துறை அமைச்சர்களும் கொண்ட அமைப்பு மாநில அரசாங்கம் என அழைக்கப்படுகிறது. இதுவே அமைச்சரவை குழுவாகும்.

VII விரிவான விடையளி

1. முதலமைச்சரின் அதிகாரங்கள் மற்றும் பணிகளை விவரி?

> மாநிலத்தின் தலைமை நிர்வாகி முதலமைச்சர் ஆவார். மாநில அரசின் பல முக்கிய முடிவுகள் அவரது தலைமையின் கீழ் எடுக்கப்படுகின்றன.

> அமைச்சரவையை உருவாக்குவதில் முதலமைச்சர் முக்கிய பங்கு வகிக்கிறார். இவரது ஆலோசனையின் பெயரில் அமைச்சர்களை ஆளுனர் நியமிக்கிறார்.

> பல்வேறு துறைகளை கண்காணித்து ஆலோசனை வழங்கி, அவற்றின் நடவடிக்கைகளை ஒருங்கிணைக்கிறார்.

> முதலமைச்சர் மாநில அரசின் கொள்கைகளை உருவாக்குவதில் முக்கிய பங்கு வகிக்கிறார். மேலும் மாநில அரசின் கொள்கைகள் மக்களின் நலனுக்கு எதிராக இல்லாததை உறுதி செய்கிறார்.

> மாநில அரசின் கொள்கை முடிவுகளில் அவரது முடிவே இறுதியானது ஆகும். இவர் மாநில அரசாங்கத்தின் உயர் பதவிகளில் நியமனம் செய்யும் முக்கிய அதிகாரத்தைக் கொண்டுள்ளார்.

> முதலமைச்சர் மற்றும் அமைச்சரவையின் ஆலோசனையின் படியே ஆளூனர் பல்வேறு உயர் அதிகாரிகளை நியமிக்கிறார்.

2. மாநில சட்ட மன்றத்தின் மன்றத்தின் அதிகாரங்கள் மற்றும் பணிகளை விவரி?

> சட்டமன்றம் ஆண்டிற்கு இரண்டு அல்லது மூன்று முறை கூடும். மாநிலத்திற்கான சட்டங்களை இயற்றுவது சட்டமன்றத்தின் முக்கிய பணி ஆகும்.

> சட்டமன்றம் மாநிலப்பட்டியல் மற்றும் மத்தியப்பட்டியலில் உள்ள துறைகள் தொடர்பாக சட்டத்தை இயற்றலாம். எனினும் நெருக்கடி நிலை நடைமுறையில் உள்ள போது சட்டமன்றம் தனது சட்டமியற்றும் அதிகாரத்தை பயன்படுத்த இயலாது.

> மாநில சட்டமன்றம் அமைச்சரவையின் மீது கட்டுப்பாட்டினை செலுத்துகிறது.

> மாநில அமைச்சரவை சட்டமன்றத்திற்கு பொறுப்புள்ளதாகவும் மற்றும் பதில் அளிக்கவும் கடமைப்பட்டுள்ளது.

> அமைச்சரவை செயல்பாடுகளில் திருப்தி ஏற்படாவிட்டால் மாநில சட்டமன்றத்தில் ஒரு நம்பிக்கை இல்லா தீர்மானத்தை இயற்றி அமைச்சரவையை நீக்கம் செய்திடலாம்.

> மாநில சட்டமன்றம் ஆனது மாநிலத்தின் நிதியைக் கட்டுபடுத்துகிறது. நிதி மசோதாவை சட்டமன்றத்தில் மட்டுமே கொண்டு வர இயலும்.

> சட்டமன்றத்தின் அனுமதி இல்லாமல் மாநில அரசு வரியினை விதிக்கவோ, அதிகரிக்கவோ, குறைக்கவோ, விலக்கிக் கொள்ளவோ இயலாது.

> சட்டமன்ற உறுப்பினர்கள் குடியரசுத் தலைவர் மற்றும் மாநிலங்களவை உறுப்பினர்களைத் தேர்ந்தெடுக்கும் தேர்தலில் பங்கு கொள்கின்றனர்.

> குறிப்பாக அரசியலமைப்பைத் திருத்தும் சில நேர்வுகளில் சட்டமன்றம் பங்கு வகிக்கிறது.

3. உயர் நீதிமன்றத்தின் அதிகாரங்களையும், பணிகளையும் எழுது?

உயர் நீதிமன்றத்தின் அதிகாரம் மற்றும் பணிகள்

> அடிப்படை உரிமைகள் மற்றும் இதர நோக்கங்களை வலியுறுத்த உயர்நீதிமன்றம் பல வித நீதிப் பேராணைகளைப் பிறப்பிக்கின்றன.

> குறிப்பாக ஆட்கொணர்வு, தகுதி முறை வினவும், தடை உறுத்தும், கட்டளையிடும் மற்றும் ஆவணங்களை தாக்கல் செய்ய வலியுறுத்தும் நீதிப் பேராணை ஆகியவற்றைப் பிறப்பிக்கின்றன.

> ஒவ்வொரு உயர்நீதிமன்றமும் தனது அதிகார எல்லைக்குள் உள்ள ராணுவ நீதிமன்றங்கள் மற்றும் தீர்ப்பாயங்கள் நீங்கலாக அனைத்து சார்நிலை நீதிமன்றங்கள் மற்றும் தீர்ப்பாயங்களை கண்காணிக்கும் அதிகாரத்தை கொண்டுள்ளது.

> சார்நிலை நீதிமன்றத்தில் நிலுவையிலுள்ள ஒரு வழக்கில் அதில் சட்ட முகாந்திரம் உள்ளது என உயர்நீதிமன்றம் திருப்தியுறும் போது இவ்வழக்கினை எடுத்து தானே முடிவு செய்யலாம்.

> இது மாநிலத்திலுள்ள அனைத்து சார் நிலை நீதிமன்றங்களையும் கட்டுப்படுத்துகிறது.

> உயர்நீதிமன்றம் உச்சநீதிமன்றத்தைப் போலவே வழக்குகள் பற்றிய பதிவேடுகளின் ஆதாரச் சான்றாக உள்ள பதிவுரு நீதிமன்றமாக விளங்குகிறது.

> குறிப்பாக அரசியலமைப்பின் பாதுகாப்பு என்பது நீதிமன்றங்கள் சுதந்திரமாக செயல்படுவதன் மூலமே உறுதி செய்யப்படுகிறது. 

VIII செயல்திட்டம் மற்றும் செயல்பாடு

1. தமிழ்நாடு மற்றும் அண்டை மாநிலங்களின் ஆளுநர், முதலமைச்சர் பெயர்களைப் பட்டியலிடுக.