தாவரவியல்: பாரம்பரிய மரபியல் - பாரம்பரியமும் வேறுபாடுகளும் | 12th Botany : Chapter 2 : Classical Genetics
பாரம்பரியமும் வேறுபாடுகளும்
மரபியல் என்பது பாரம்பரியம் மற்றும் வேறுபாடுகள்
பற்றி அறியும் ஓர் அறிவியல் என்று வரையறுக்கப்படுகிறது.
பாரம்பரியம் (Heredity): பெற்றோர்களிடமிருந்து
சந்ததிகளுக்குப் பண்புகள் கடத்தப்படுவது பாரம்பரியம் எனப்படுகிறது.
வேறுபாடு (Variation): இயல்பான ஒத்த இனத்தொகையிலுள்ள
உயிரினங்களின் அல்லது அவற்றின் சிற்றினங்களின் பண்புகளுக்கிடையே காணப்படும் வித்தியாசமே
வேறுபாடு எனப்படுகிறது. இவ்வேறுபாடு இருவகைப்படும். அவையாவன (i) தொடர்ச்சியற்ற வேறுபாடுகள்
(ii) தொடர்ச்சியான வேறுபாடுகள்.
ஓர் உயிரினத் தொகையில் சில பண்புகளில் குறிப்பிட்ட
அளவு வேறுபாடுகள் காணப்படுகின்றன. எடுத்துக்காட்டுகள்: பிரைமுலா தாவரத்தின் சூலகத்
தண்டின் நீளம் தோட்டப்பட்டாணிச் செடியின் உயரம் (நெட்டை அல்லது குட்டை). இந்தத் தொடர்ச்சியற்ற
வேறுபாட்டில் பண்புகள் ஒன்று அல்லது இரண்டு முக்கியமான மரபணுக்களால் கட்டுப்படுத்தப்படுகிறது.
இம்மரபணுக்கள் இரண்டு அல்லது அதற்கு மேற்பட்ட அல்லீல்களை (இணை மரபணு வடிவங்கள்) கொண்டிருக்கும்.
இவ்வேறுபாடுகள் மரபியலில் கடத்தும் காரணிகள் மூலம் தீர்மானிக்கப்படுகிறது. இவ்வேறுபாடுகளைப்
பெற்ற தனி உயிரிகள் இடைநிலை தோற்றப்பண்புகளற்ற நிலையைப் பெற்றுள்ளன. இவ்வகை புறத்தோற்றப்
பண்புகள் சூழ்நிலைக் காரணிகளால் பாதிக்கப்படுவதில்லை இது பண்புசார் பாரம்பரியமாதல்
(qualitative inheritance) என்றும் அழைக்கப்படுகிறது.
இவ்வேறுபாடுகள் சூழ்நிலை மற்றும் மரபுக் காரணிகளின்
கூட்டு விளைவுகளால் தீர்மானிக்கப்படுபவைகளாக இருக்கலாம். ஓர் உயிரினத்தொகையில் பெரும்பாலான
பண்புகள் முழுவதுமாகத் தரம் பிரிக்கப்பட்டு ஒரு நிலையிலிருந்து மற்றொரு நிலை வரை எவ்விதத்
தடையுமின்றி வெளிப்படுத்தப்படுகிறது. புறத்தோற்றப் பண்புகளின் பாரம்பரியம் பல மரபணுக்கள்
மற்றும் சூழ்நிலைக் காரணிகளின் கூட்டுச் செயல்விளைவுகளால் தீர்மானிக்கப்படுகிறது. இது
எண்ணிக்கை சார் பாரம்பரியமாதல் (quantitative inheritance) என்று அறியப்படுகிறது. எடுத்துக்காட்டு:
மனிதனின் உயரம் மற்றும் தோல் நிறம்.
• சில உயிரிகளில் காணப்படும் வேறுபாடுகள் போராடி,
வாழ்தலில் சிறந்த உயிரியாக மாறுவதன் அடிப்படையில் அமைகின்றன.
• மாறும் சூழ்நிலைகளுக்கேற்பத் தம்மைத் தகவமைத்துக்
கொள்ள உதவுகிறது.
• இது இயற்கைத் தேர்வுக்கான மரபியல் பண்புகளை
வழங்குவதாக உள்ளது.
• மேம்படுத்தப்பட்ட உற்பத்தி, விரைவான வளர்ச்சி,
அதிக நோய் எதிர்ப்புத்தன்மை மற்றும் குறைவான முதலீடு கொண்ட தாவரங்களை , பயிர் பெருக்க
உற்பத்தியாளர்கள் உருவாக்குவதற்கு வேறுபாடுகள் துணை புரிகின்றது.
• பரிணாமத்தின் மூலங்களாக வேறுபாடுகள் அமைகின்றன.