இயக்கத்தின் வகைகள்
அன்றாட வாழ்வில் கீழ்க்கண்ட வகையான இயக்கங்களை நாம் காணலாம்.
ஒரு பொருள் நேர்க்கோட்டில் இயங்கினால் அவ்வியக்கம் நேர்க்கோட்டு இயக்கம் என அழைக்கப்படும்.
எடுத்துக்காட்டுகள்
· நேரான ஓடுபாதையில் ஓடும் தடகள வீரர்
· புவியினை நோக்கி விழும் பொருள்
வட்டப்பாதையில் இயங்கும் பொருளின் இயக்கம், வட்ட இயக்கம் என அழைக்கப்படும்.
எடுத்துக்காட்டுகள்
· கயிற்றில் கட்டப்பட்டு சுழற்றப்படும் கல்.
· புவியினைச் சுற்றிவரும் செயற்கைக் கோளின் இயக்கம்.
இவை படம் 2.5 இல் காட்டப்பட்டுள்ளன.
எந்த ஒரு திண்மப்பொருளும் ஒரு அச்சினைப் பொறுத்து சுழலும் போது, அவ்வியக்கம் சுழற்சி இயக்கம் என அழைக்கப்படும். அச்சுழற்சியின் போது திண்மப்பொருளில் உள்ள எந்த ஒரு புள்ளியும் அவ்வச்சினை பொறுத்து வட்ட இயக்கத்தை மேற்கொள்ளும். (சுழல் அச்சில் உள்ள புள்ளியைத் தவிர்த்து)
எடுத்துக்காட்டுகள்
· அச்சினைப் பொறுத்து சுழலும் வட்ட வடிவத்தட்டு
· அச்சினைப் பொறுத்து தன்னைத்தானே சுற்றும் புவி.
இவைகள் படம் 2.6 இல் காட்டப்பட்டுள்ளன.
பொருளொன்று நிலையான ஒரு புள்ளியைப் பொறுத்து முன்னும் பின்னும் இயக்கத்தினை மேற்கொண்டால், அவ்வியக்கம் அதிர்வியக்கம் எனப்படும். சில நேரங்களில் இவ்வியக்கம் அலைவு இயக்கம் எனவும் அழைக்கப்படும்.
எடுத்துக்காட்டுகள்
· கிட்டார் (Guitar) இசைக்கருவியில் உள்ள அதிர்வடையும் கம்பி
· ஊஞ்சலின் இயக்கம்
இவை படம் 2.7 இல் காட்டப்பட்டுள்ளன
மேலே கூறப்பட்ட இயக்கங்கள் மட்டுமல்லாமல் நீள்வட்ட இயக்கம் மற்றும் வரிச்சுருள் இயக்கம் (Helical) போன்ற வேறு இயக்கங்களும் நடைமுறையில் சாத்தியமாகும்.