பின்வரும் வினாக்களுக்கு விரிவான விடையளிக்கவும்.

V. பின்வரும் வினாக்களுக்கு விரிவான விடையளிக்கவும்.

1. நகரமயமாக்கம் என்றால் என்ன? அதன் சிக்கல்கள் யாவை?

நகரமயமாக்கம்:

கிராமப்புற சமுதாயம் நகர்ப்புற சமுதாயமாக மாற்றமடைவதையே  நகரமயமாக்கம் என்கிறோம்.

நகரமயமாக்கலின் சிக்கல்கள்:

• நகரமயமாக்கலும், மக்கள் தொகை அடர்த்தியும் ஒன்றோடொன்று நெருங்கிய தொடர்புடையவை.

• கிராமத்திலிருந்து நகரங்களுக்கு இடப்பெயர்தல் நகர்ப்பகுதிகளில் மக்கள் தொகை வெடிப்பிற்கு வழிவகுக்கின்றது.

இந்தியாவில் நகரமயமாக்கலால் ஏற்படும் பிரச்சனைகள்:

• நகர விரிவாக்கத்தை ஏற்படுத்துகிறது.

• நகர்புறங்களில் குடியிருப்புகளின் பற்றாக்குறையை உருவாக்குகிறது. .

• குடிசைப் பகுதிகள் தோன்ற காரணமாக உள்ளது.

• போக்குவரத்து நெரிசலை அதிகப்படுத்துகிறது.

• குடிநீர் பற்றாக்குறையை ஏற்படுத்துகின்றது.

2. இந்தியாவில் செயற்கைகோள் தகவல் தொடர்பின் முக்கியத்துவத்தை விளக்குக.

• செயற்கைக்கோளானது தொடர்ச்சியாக மிகப்பெரும் பரப்பிலான பதிமம் மற்றும் தகவல்களை அளிக்கிறது.

• செயற்கைக்கோள் பதிமங்களைப் பயன்படுத்தி வானிலை ஆய்வு, வானிலை முன் அறிவிப்பு, இயற்கை பேரழிவு கண்காணிப்பு, எல்லை பகுதி கண்காணிப்பு போன்ற முக்கிய பணிகள் மேற்கொள்ளப்படுகின்றன.

• இந்தியாவில் செயற்கைக்கோள் தகவல் தொடர்பு அமைப்பு இரண்டு பிரிவுகளைக் கொண்டது. அவை: இந்திய தேசிய செயற்கைக்கோள் அமைப்பு, இந்திய தொலையுணர்வு செயற்கைக்கோள் அமைப்பு.

• 1983-இல் நிறுவப்பட்ட இந்திய தேசிய செயற்கைக்கோள் அமைப்பு தொலை தொடர்பு, வானியல் ஆய்வு மற்றும் பல்வேறு திட்டங்களை உள்ளடக்கிய ஒரு பல்நோக்கு திட்ட அமைப்பாக உள்ளது.

• இன்சாட் வரிசை செயற்கைக்கோள், கைபேசி தொலைபேசி, வானொலி மற்றும் தொலைக்காட்சிகளுக்கு சமிக்கைகளை அனுப்ப பயன்படுகிறது.

• வானிலையை கண்டறியவும், இராணுவ பயன்பாட்டிற்கும் பயன்படுத்தப்படுகிறது.

• இன்சாட் வரிசை, ஜி-சாட் வரிசை கல்பனா 1, ஹேம்சாட், எஜுசாட் போன்றவை தகவல் தொடர்பிற்காக பயன்படுத்தப்படும் முக்கிய செயற்கைக்கோளாகும்.

3. இந்தியாவின் சாலைகளை வகைப்படுத்தி விளக்குக.

இந்திய சாலைகள்

• தேசிய நெடுஞ்சாலைகள்

• மாநில நெடுஞ்சாலைகள்

• மாவட்ட சாலைகள்

• கிராமப்புறச் சாலைகள்

• எல்லையோர சாலைகள் மற்றும்

• பன்னாட்டு நெடுஞ்சாலைகள் என வகைப்படுத்தப்பட்டுள்ளன.

இந்திய சாலைகளின் வகைகள்:

அ) தேசிய நெடுஞ்சாலைகள்

• தேசிய நெடுஞ்சாலைகள் வடக்கு-தெற்கு, கிழக்கு-மேற்காக நாட்டின் எல்லைகளையும், மாநிலங்களின் தலைநகரங்கள், முக்கியத் துறைமுகங்கள், இரயில் நிலையங்கள், முக்கிய சுற்றுலா மையங்கள், தொழில் மையங்கள் ஆகியவற்றை இணைக்கின்றன.

• இந்தச் சாலைகள் இந்திய அரசின் தரைவழி மற்றும் நெடுஞ்சாலைத் துறை பராமரிக்கிறது.

• இந்தியாவில் மிக நீளமான தேசிய நெடுஞ்சாலை NH 7 ஆகும்.

ஆ) மாநில நெடுஞ்சாலைகள்:

• மாநிலத்திலுள்ள முக்கிய மாநகரங்கள், நகரங்கள் மற்றும் மாவட்ட தலைநகரங்களை மாநில தலைநகரத்துடனும் தேசிய நெடுஞ்சாலைகளுடனும் அண்டை மாநில நெடுஞ்சாலைகளுடனும் இணைக்கின்றன.

• இந்தச் சாலைகளை மாநில பொதுப்பணித்துறை பராமரிக்கிறது.

இ) மாவட்டச் சாலைகள்:

• மாவட்டச் சாலைகளானது மாநில நெடுஞ்சாலைகள் மற்றும் தேசிய நெடுஞ்சாலைகளுடன் மாவட்ட மற்றும் வட்டார தலைமை இடங்களை இணைக்கிறது.

• மாவட்ட சாலைகள் மாநிலத்தின் பொதுப் பணித்துறையால் அமைக்கப்பட்டு பராமரிக்கப்படுகிறது.

ஈ) ஊரகப் பகுதி சாலைகள் (கிராமச் சாலைகள்):

• இச்சாலைகள் கிராமப்புறங்களை இணைப்பதில் முக்கிய பங்காற்றுகின்றது.

• இது பல்வேறு கிராமங்களை அதன் அருகில் உள்ள நகரங்களுடன் இணைக்கிறது.

• இவைகளை கிராம பஞ்சாயத்துகளால் பராமரிக்கப்படுகின்றன.

உ) எல்லைப்புறச் சாலைகள்:

• எல்லைப்புறச் சாலைகள் நாட்டின் எல்லைப் பகுதிகளில் அமைந்துள்ள ஒரு சாலை வகைகளாகும்.

• இவைகள் எல்லைப்புறச் சாலைகள் நிறுவனத்தால் அமைக்கப்பட்டு பராமரிக்கப்பட்டு வருகின்றன.

ஊ) தங்க நாற்கரச் சாலைகள்:

• இது 5,846 கி.மீ நீளத்தையும் 4 முதல் 6 வழிகளைக் கொண்டதாகவும் உள்ளது.

• இது வடக்கு தெற்காக இந்தியாவின் நான்கு பெரு நகரங்களான புதுடெல்லி – கொல்கத்தா - சென்னை - மும்பை - புதுடெல்லி ஆகியவைகளை இணைக்கிறது.

எ) விரைவுச் சாலைகள்:

நன்கு மேம்படுத்தப்பட்ட தரமான பல்வழிப் பாதைகளைக் கொண்ட அதிவேக போக்குவரத்திற்கான சாலைகள் ஆகும். எ.கா: மும்பை - பூனா விரைவுச் சாலை.

ஏ) பன்னாட்டு நெடுஞ்சாலைகள்:

• இந்தியாவை அண்டை நாடுகளுடன் இணக்கமான உறவை மேம்படுத்தும் நோக்கத்துடன் இணைக்கப்பட்டுள்ளது.

• இச்சாலைகள் பாகிஸ்தான், நேபாளம், பூடான், வங்கதேசம் மற்றும் மியான்மர் ஆகிய அண்டை நாடுகளை இணைக்கின்றன.